政壇：搞搞政：選港區人大福建幫大贏

港區全國人大換屆選舉早前落幕，三十六名新當選港區人大嘅得票多寡同排名固然可堪玩味，其實各大政治勢力嘅更迭更值得留意，因為倘以政黨背景劃分，建仔再度蟬聯港區人大「大戶」，粗略計算至少有七、八人係佢哋嘅成員，包括新當選嘅新界社團聯會理事長陳勇、中華出入口商會副會長張明敏等。

但要數今次選舉嘅真正大贏家，必定係近年多元化發展嘅「福建幫」，事關五年前嘅人大選舉，有科技大學副校長黃玉山同東區區議員蔡素玉兩人成功入局，今年竟然翻兩番由二變八，工商專聯主席黃友嘉、香港島各界聯合會理事長蔡毅同南旋集團主席王庭聰等都循不同渠道成功出線，加上部分同福建有特殊淵源嘅當選人，同「福建幫」有關連嘅甚至多達十人。

如果再加埋民政事務局副局長嘅許曉暉、最近獲委任做教育局政治助理嘅十優狀元施俊輝都係福建人。至於喺立法會方面，建仔嘅陳克勤同金融服務界張華峰都係閩籍中人，由此可見「福建幫」近年喺政圈漸趨活躍確有迹可尋。