政壇：基層團體封田少黑心國王

富貴黨日前發表調查報告話香港失業率下跌，但申領失業綜援個案嘅下跌幅度唔及失業率跌得咁多，該黨榮譽主席田北俊仲話擔心綜援養懶人，建議為失業綜援設年限。田少此話一出，即刻惹來一眾基層團體不滿。尋日關注綜援低收入聯盟等多個團體同埋一眾街坊，包括申領綜援嘅人士就去咗富貴黨總部抗議，批評該黨同田少抹黑攞綜援嘅街坊。佢哋頒咗個「歧視基層飛躍大獎」畀戴住田少肖像面具嘅「翻版田少」，仲送埋支「黑心權杖」同皇冠畀佢，冊封佢為「黑心國王」添！