政壇：陳維安跌傷手最煩打呔

立法會主席曾鈺成同二十多位議員尋日與本港六大慈善團體嘅領導交流意見，但最令人矚目嘅竟然係立會秘書長陳維安，事關佢左手受傷包紮。到底發生何事？

原來佢早前同家人去新西蘭度假，喺行程結束前一日到訪昆斯敦，學玩靠人體重心驅動嘅兩輪車Segway，點知剛上車行咗幾步，甫落斜路即連人帶車失去平衡。佢話見到左手腫如豬蹄，都心知大事不妙，返港求醫經診斷發現左手腕骨爆裂，除咗要打石膏六個星期，更要用兩口釘來固定患處，估計要兩至三個月才可以完全康復。佢話依家單靠右手仲可以勉強應付日常生活，但最令佢苦惱嘅係無法單手打領呔，話現正物色小學生常用嘅橡筋式領呔嚟「頂住先」。