政壇：董耀中要爆旅業內幕

每次發生香港導遊同內地遊客爭執，或者港人在外發生旅遊事故，總會第一時間同傳媒交代最新情況嘅香港旅遊業議會總幹事Joseph董耀中，近期突然轉走才子界，最快今個月底推出佢本處男著作《旅業風雲》，分享佢喺旅遊界四十幾年嘅心路歷程，希望喚醒大家嘅集體回憶喎。今年底就夠期退休嘅佢突然出書，唔知係咪為咗即將來臨嘅退休生活鋪定後路呢?

曾處理阿珍零團費

Joseph尋日自爆本新書用咗九個月時間準備，依家已接近尾聲，最快今個月尾面世，仲搵埋拍檔兼好友的旅議會主席Micheal胡兆英幫手寫序。

曾經處理過「阿珍」、「打擊零團費」同檢討旅遊業規管架構等燙手山芋嘅Joseph，承認最深刻係喺旅議會工作，但新書暫時唔會講太多旅議會嘅事，主要講吓旅遊業過去幾十年嘅演變，例如旅行社同航空公司嘅關係轉變；當年佢喺日本航空公司任職嘅時候，每日要打成幾十個電話同電報幫客人訂機位等辛酸經歷，當然唔少得啟德機場嘅工作點滴啦。

每次名人出書都離唔開大踢爆，咁本書有冇料爆先？點知Joseph話冇，事關本書仲有下集，當下集出版嘅時候，佢已離開咗旅議會，仲講笑話到時佢不在其位，唔排除會講吓旅議會勾心鬥角或Micheal蝦佢等鮮為人知嘅故事。

咁即係，爆料都要等下集喇！咁大家要耐心啲等吓嘞！