貪腐創意攀高峰 文化產業一場空

二○一二年結束，「香港設計年」落幕，大家有無捧場呀？

吓，唔知香港設計年係乜東東？聽都未聽過？唔……台灣「香港週2012」亦經已閉幕，大家有乜意見呀？

吓，又係唔知乜東東？又係未聽過？唔……咁有件事大家一定是最清楚嘞，就係政府搞文化產業只係整色整水一場騷，實際全部假大空，叮！

其實設計年同香港週係前朝政府推動文化產業嘅兩項「政績」工程，合共耗費咗九千萬元公帑。不過錢就花得多嘞，效益低到唔恨，兩項活動無聲無息慘淡收場，莫講普羅大眾未聽過，連行內人士好多都唔知道，你話嘞，政府咁樣推動文化產業，係咪同做騷無分別吖？

最離譜嘅係，做騷都逼真啲吖。業界話齋，政府對設計年完全零宣傳，不負責任，而對參與香港週嘅藝團亦缺乏支援，籌辦過程亂七八糟，呢啲根本唔係推動文化，而係漠視文化。有目共睹，官老爺做騷都做到咁唔專業，文化產業呢台大龍鳳邊有希望演出成功呢？未到曲終人散，已經被人柴台噓爆啦！

舞台係人生縮影，設計年同香港週慘淡收場，正正就係港府管治嘅寫照。前特首曾蔭權爵士扮演港府一把手嘅時候，開口埋口發展六大業產，其中一樣就係「文化及創意」，吹到天花龍鳳，又話打造香港為文化創意之都，又話加快建造西九文娛藝術區，結果拖到落台滾蛋嘞，文化創意無產業，港府推動無創意，文化創意之都仍然無影無蹤，西九文娛藝術區依舊只係空中樓閣。如果你係觀眾，睇見一齣咁嘅施政鬧劇，係咪嬲到鎅櫈走人吖？

貪曾唔識照鏡，都應該搵盆水照吓自己個樣，一個毫無文化可言嘅政治蠱惑仔，學乜人搞文化產業吖，搞貪腐產業就差唔多！嗱嗱嗱，講到貪腐呢家嘢，貪曾就最在行嘞，身為前朝政府阿一，唔止傍住富豪黐飲黐食，連肥雞菜心跑步機都大小通吃，直頭舔到汁都無，貪腐手段登峰造極又創意無限，唔使搞宣傳早就名臭中外蜚聲國際啦。

一句到尾，一個醉心貪腐嘅「痛心特首」提出搞文化產業，本身已經係一個黑色幽默笑話，更何況貪曾志大才疏，眼高手低，唔使等到散場，呢檔文化產業大龍鳳注定一場空，叮！