政壇：政商定格：肥胡送暖撐生命小戰士

醫院管理局主席胡定旭同新界東聯網總監馮康醫生，前日元旦參加「生命小戰士」派對，同一班癌病兒童大玩遊戲、唱歌仔同派糖果，令一眾「小戰士」高興萬分。

肥胡話大約六、七年前首次接觸呢個病人組織，覺得好有意義，尤其見到佢哋由癌病康復者出任義工，幫助一班自出世就要面對惡疾嘅小童同家長，深受感動，自此之後，佢必定會出席該組織嘅活動，亦會出錢贊助活動添！

講到新年願望，肥胡同馮康都不約而同笑笑口，話最希望人人都冇病痛，所有醫院剩番令大家開心嘅產科就夠喇！