政壇：搞搞政：唔遊行被扣帽子施麗珊反擊

一直關注基層市民問題嘅社區組織協會（SoCO），過往亦經常參加或自發遊行請願，但佢哋冇參加元旦日嘅倒梁大遊行，點知惹嚟麻煩。商台節目《左右大局》主持人喺遊行完結當晚，喺節目中致電SoCO幹事施麗珊，批評SoCO唔參加民陣遊行係因主任何喜華做咗「梁粉」，仲做埋扶貧委員會成員，質疑佢哋已變成建制派。

施麗珊反駁話SoCO每次遊行都要問街坊意見，佢哋今次唔參加係因為民陣擺明「倒梁」，針對特首CY梁振英個人，但街坊就覺得CY上任後推出咗唔少民生措施。至於話何喜華係「梁粉」，佢就直言特首競選期間都有邀請其他候選人落區，只係CY肯出席，而何喺上兩屆政府都係扶貧委員會成員。

雖然佢已清楚解釋，但主持人仍咬住唔放，話SoCO聲稱要實踐公義但又唔遊行，激到佢發嬲︰「係咪唔參加遊行就唔實踐公義，唔知香港點解變到咁。你哋簡直係政治迫害、白色恐怖、迫害街坊，好失望！」其實唔單止電台節目上綱上線，社交網站亦批評SoCO因收咗捐款而唔去遊行。好多組織都收捐款維持社區服務o架啦，係咁亂扣帽子，唔係文革式批鬥又係乜呢？

SoCO尋日亦發表聲明反駁前日《蘋果日報》有關「社協跪低，收巨款拒遊行」嘅報道，強調報道提及該會收取嘅捐款係全數用於扶貧項目，重申該會繼續扎根基層，堅守人權法治，致力為基層市民和弱勢社群發聲。