政壇：股市爆升難阻細行「墮崖」

尋日美國率先送咗份新年「厚禮」畀全球股民，及時通過解決財政懸崖法案，全球股市愈升愈「high」，恒指下晝開市爆升，聽聞有個喺美資行做基金經理嘅朋友，下晝已經忍唔住要「柯打」到會，更揚言當恒指升至25,000點，會開香檳慶祝。不過，有人歡喜有人愁，有細經紀行撐唔住「墮崖」，尋日正式結業，為證券業流下今年「第一滴血」。

曾幾何時香港地嘅證券經紀個個穿金戴銀，晏晝係咁意都要整番個魚翅撈飯，可惜今時唔同往日，銀行「撈過界」搶生意不特止，仲要面對「割喉式減佣戰」，遇着淡市甚至金融海嘯，細經紀行更加無啖好食，舊年總數已有最少十間經紀行投降結業，估唔到今年咁快就輪到裕安證券「陣亡」，過唔到呢個年關。

裕安證券停止營業嘅通知，尋日喺聯交所嘅網站登咗出嚟。不過，行內人士透露，個多月前已聽聞裕安證券即將光榮結業，仲話旗下工作人員都安排好「後着」，家陣惟有寄望大市反彈，救番其他企喺懸崖邊嘅細經紀行。