民陣喺元旦日搞「倒梁」遊行，撐政府團體「愛港之聲」就喺政府總部搞嘉年華會「挺梁」，而佢哋嘅召集人高達斌仲被發現原來係新民黨黨員添！
該黨主席葉劉淑儀尋日話同呢位黨員唔熟，但經了解後知道高達斌都係自發性咁搞活動。佢又話人人都有言論自由，高達斌都係支持政府同行使自己嘅權利啫，冇影響到黨嘅聲譽，所以唔會有乜紀律處分。不過，基於高達斌嘅「雙重身份」，葉劉就話黨員搞類似活動嘅話，禮貌上同黨講聲會好啲喎。