政壇：莊偉茵偷閒做gym夾band

國泰航空前公關一姐Quince莊偉茵過檔擔任中電企業發展總裁後，雖然唔使再周圍飛，但工作比以前更忙，除忙於為中電加價解畫，更要不停開會、應酬同飯局，佢笑言：「依家唔係備戰，係已經開戰！」但忙歸忙，佢都冇放棄到興趣，gym照做、band照夾，入職短短時間內已同中電隊band喺員工活動表演過兩次，合作相當愉快。

佢自爆兒時係肥妹仔，加上高大嘅身形，予人感覺好惡，男仔都唔係好敢同佢玩。佢讀書時常被調到最後一排坐，慢慢形成沉默寡言嘅自卑性格。出到社會做嘢後，膽子慢慢練大，baby fat漸消失，自信心返晒嚟。

佢又勉勵年輕人，唔一定要含住金鑰匙出世至可以有所作為，其實靠毅力同拚搏都可闖出一片天地。