政壇：古諮會新帥接燙手芋

古諮會大換血，注入唔少「梁粉」。政府尋日宣布委任規劃師林筱魯做古諮會主席，接替離任嘅Bernard陳智思。林筱魯話一直熱愛古蹟保育工作，做主席唔係捱義氣。

林筱魯曾隨陳智思請辭

林筱魯曾喺中區政府合署西座保育爭議中跟隨Bernard請辭，今次接任，佢話風波總會有，亦有心理準備喺新職位上，面對多方面壓力。咁即係話，雖然佢係梁粉，但今次由委員紮職做主席，並唔係益佢嘅筍工，後面仲有好多燙手山芋等佢接。

話口未完，佢就話古諮會要完成餘下嘅評級工作，亦都希望檢討保育政策。對於古諮會新血有唔少梁粉，佢話冇跟進呢個問題，政府委任唔同背景、經驗嘅人，有其代表性。

喺十二位新成員當中，最矚目係做過梁振英競選辦副主任嘅香港明天更好基金行政總裁鄧淑德、新昌營造前非執董陳家駒、中西區區議員陳捷貴、香港大學城市規劃同設計系教授趙麗霞、中文大學建築學院院長何培斌、建築師廖宜康、大律師林清培、顧問公司麥肯錫香港區總經理倪以理、會計師盛慕嫻、規劃署前署長謝淑瑩、房屋署前副署長黃比，仲有唐營嘅互聯網專業協會（iProA）前會長鄧淑明。

外界盛傳「公職王」Bernard離任古諮會主席後，旋即番兜做社聯主席，係想減少自己惹禍嘅機會，為將來競選特首鋪路。但佢向我哋澄清，絕冇專揀啲少爭議嘅公職嚟做，否則就唔會繼續做可持續發展委員會主席，處理固體廢物徵費。佢又話要執行垃圾徵費好複雜同困難，隨時會得罪好多人。