疫情資訊多甩漏 港人遊埠搵命博

新年剛到，春節將臨，又係港人出外遊埠嘅高峰期。太一叮不厭其煩提醒大家一句，君子不立危牆之下，譬如打緊內戰嘅敍利亞同治安不靖嘅菲律賓，港府已經發出黑色旅遊警告，大家免得過都係唔好去啦。

除咗戰亂同治安問題，世界上仲有一種睇唔到嘅奪命威脅──疫症。唔係靠嚇，全球每年死於疫症嘅總人數遠遠多過戰爭。淨係一個豬流感，墨西哥就死咗百幾人。當年本港嘅沙士更奪走近三百條人命，諗起嗰段個個戴口罩嘅日子都驚。

見過鬼怕黑。疫情無疆界，當其他地方爆發疫症，港府係咪應該清清楚楚發放資訊，提醒市民預防呢？死得佢吖，原來保安局嘅「三色旅警」居然唔包疫情，市民要知道旅遊目的地嘅傳染病等健康風險，必須另外查閱衞生署轄下嘅「旅遊情報」網站。同樣係旅遊風險，點解唔可以統一發放方便大家呢？好明顯兩個部門互不協調滾攪市民，叮！

唉，部門互不協調都算啦，最弊嘅係，衞生署嘅網站內容甩漏百出，有情報等於無情報。本報記者對照台灣同英國嘅同類官網，以泰國舊年爆發登革熱為例，人哋嘅網頁早於五月二十二日已經發出警告，香港拖到七月四日先至公布。舊年七月起，英國、希臘、德國、丹麥、俄羅斯同內地江蘇省、遼寧省都有人感染炭疽病，本港衞生署淨係提及俄羅斯有人染病。

仲有呀，早前印度、不丹、法國同日本都有人感染屈公病，越南北部、巴基斯坦及南蘇丹分別爆發狂犬病、原發性阿米巴腦膜腦炎同戊型肝炎，對於呢啲疫症，所謂旅遊情報居然隻字不提。

漏報遲報疫情資訊，後果可大可小o架。舊年四月咋嘛，柬埔寨爆發腸病毒71型手足口病，衞生署拖到七月四日先至公布。結果六月中，本港一個旅行團懵然不知前往當地，一行三十二人有十五人中招，好彩及早發現醫番好咋，萬一染上殺傷力大、潛伏期長嘅新型惡菌，隨時一個唔覺意將疫症帶返香港都有之！

其實喺全球一體化嘅今日，防疫亦都全球化，當局只要參考世衞疫情資訊，及時示警一啲都唔難。港府連咁簡單嘅事都做唔好，令太一叮諗起蘇東坡嘅一首詩：不識廬山真面目，只緣身在此山中。因為官僚長期身處官場醬缸，渾渾噩噩過日辰，不報疫區真面目；市民遊埠都要搵命博，隨時身陷險境都唔知，叮！