SUN搞作：打橫嚟講：買樓「實呎制」的覺醒

由二○一三年第一日起，香港的樓宇呎價買賣，要以「實積計價」，即是須列明「實用面積」資料，讓買方計算到單位內每呎的「真正」售價。

一直以來，香港人的畸形心理變態，不多不少是來自受地產商「偽術語言」之薰陶而成的，例如，話明係七千蚊一呎的價錢，用上三百多萬，只能買到二百來呎的樓仔，咁樣嘅不合理交易，香港人竟已有「共識」，是可以接受的，全球只有香港呢度至會發生啲咁嘅事！

見過一個地產經紀佬，在電視上推介新樓盤時，當着鏡頭話：「呢度可用嘅實用面積，高達七成半o架！真係好抵o架！」吓！縮水成咁都話抵？你話幾變態吖？

買條褲返嚟，縮水三成，點着得落？褲都仲還好，買對鞋，如果細咗三個碼？點搞？

地產佬賣「發水樓」，是得到政府開綠燈做幫兇，畀佢哋公然行騙的，這樣的劣行，不特只肥了地產商，更大的禍害，是令社會事物的價值觀、道德觀和是非判斷都扭曲晒，大家明知是不對的，除了不提異議外，還肯定地去接受，努力地去適應。

今天，如果不是地產佬肆無忌憚的掠水過分，加上香港本地人已窮得買不起樓，相信，這項買樓「實呎制」一定沒有人理會，沒有提上「議程」審議，大家仍安心的「自欺」買了好抵的大屋！

好啦！新一年開始，香港人可以醒覺了！不再受「偽術語言」愚弄矣！不過，呢度仲有好多不同層面，大大小小的謊言呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府