政壇：政商定格：雷兆光舉家太空裝倒數

前晚除夕倒數，唔少名人舉家慶祝，變家庭樂。九巴後人雷兆光伉儷偕兩女一子前晚就到金鐘出席「FF Ball」倒數派對，同場仲有扒女李依林同男友、孫大倫伉儷同名媛陳燭光等。派對主題係外太空，雷太雷林靜怡同兩個囡囡皆穿上紅色裙，仲戴上面罩，囝囝就揸住黑武士面具，非常貼題，雷林靜怡話，新年願望係全家身體健康。咁會唔會再追多個仔湊成兩個好字？佢笑言：「生唔出啩！（走下場？）12點後無醉再話你知。」孫大倫伉儷齊聲表示新年願望希望再添孫兒，令家庭更熱鬧。