政壇：政商定格：譚志源陳南祿齊晒千金
沙田馬場尋日舉行元旦賽馬日，亦有好多令人眼前一亮嘅新面孔。先係馬會大董兼恒隆地產董事總經理Philip陳南祿，同一名妙齡女郎十指相扣入場，細心一看，原來係佢嘅囡囡Michelle，小妮子激瘦咗兩個碼，成個人靚晒。政制及內地事務局局長Raymond譚志源亦拖埋女兒譚希文入場，趁元旦假期帶埋家人一齊玩吓。
喺美國讀緊書嘅Michelle話，每日入健身房做運動，初時每日做一小時，依家加碼做足兩個半小時，已經堅持咗一年。一路細心聽囡囡講嘅Philip就忍唔住插嘴笑稱，讀緊書先至咁得閒，要搵食嘅人邊有咁得閒吖！不過，Philip都好驕傲囡囡嘅蛻變，仲笑笑口問，囡囡係咪好似佢喎！
譚志源（左）同女兒希文（右）入馬場輕鬆吓。
陳南祿（右）嘅寶貝女Michelle（左）清減好多，兩父女拖實手周圍走。