政壇：搞搞政：謝偉銓吼實園景師票倉

喺立法會三十一個功能組別中，建築、測量及都市規劃界個名就最長兼蹺口，但該界別議員Tony謝偉銓似乎仲嫌個名未夠長，諗住要求政府加入「園景」兩字。佢解釋，今屆園景師選民人數較以前上升三百人外，更有唔少園景師同佢講，既然佢哋有份投票，界別名稱應加埋「園景」兩字。

政制及內地事務局局長譚志源之前要求功能組別嘅建制派議員，諗計擴大功能界別投票人數之餘，又可力保建制派喺呢啲界別嘅影響力。泛民主派嘅吳永輝今屆參選呢個界別僅以二百零四票落敗，下屆大有機會捲土重來。如果Tony可成功吸納到園景師呢個大票倉，下屆成功連任嘅機會就會大增，亦間接幫咗譚志源一把。

Tony話依家界別個名已有十個字，若加埋「園景」兩字，就破紀錄有成十二個字。雖然中文對佢嚟講都唔算難記，但英文嘅Architectural, Surveying, Planning and Landscaping就極有難度。至於「園景」兩字應該擺喺邊度，佢就笑笑口話應由政府去諗喎！