政壇：建仔重返維園年宵

由一○年開始，建仔突然將年宵攤位移師去荃灣等地，有網民當時估計佢哋係因為怕畀人追擊先避開維園，但事隔兩年後，佢哋以行動證明無懼追擊，決定今年重返維園年宵。

建仔成日都被泛民主派批評搞「蛇齋餅糉」贏取市民支持，殊不知佢哋今年諗住食正蛇年嘅熱潮，索性將年宵主題改做「點止蛇齋餅糉咁簡單」，到時會主打熱賣蛇齋餅糉嘅新年福袋，實行自嘲，以退為進。

頭獎送智能手機

至於年宵嘅主禮嘉賓方面，據聞該黨心中已有腹稿，例如邀請民政事務局局長曾德成、該黨嘅前副主席、商務及經濟發展局局長蘇錦樑等，反而都係前副主席嘅政制及內地事務局副局長劉江華暫時榜上無名。咦！兩個都係前副主席，呢次都係回「娘家」撐場啫，點解有唔同對待呢？

有建仔中人形容，劉江華上任至今好受各方關注，笑言一旦邀請佢嚟會搶晒風頭，變相令佢哋個年宵活動少咗關注，但話說回來，劉江華喺「超高人氣」定必吸引各大傳媒注視，間接可能帶旺建仔年宵嘅人氣，所以建仔依家對係咪請劉江華仲係「十五十六」喎！

講開佢哋嘅年宵活動，不得不提最新舉辦嘅「年度漢字」評選活動，事關投票選中「年度漢字」嘅十多名幸運兒，將有機會瓜分共一萬七千元獎金獎品，其中頭獎係價值超過四千二百元嘅最新款智能手機，另有安慰獎十名，每人有八百元超市現金券，呢個抽獎結果將會喺建仔年宵開幕禮上公布，客觀效果唔知會否令市民更關注建仔年宵消息呢？