官僚腦袋迂腐 保育進退失據

歲月無聲，轉眼一年。喺時光洪流嘅無情沖刷下，逐漸變老變舊變壞變朽嘅，唔止係人嘅體貌，仲有城市嘅建築物同官老爺嘅保育政策，所以香港近年先至會為咗保育歷史建築物拗生拗死風波不絕。

嗱，今時今日建築物朽壞可以修葺還原，人老珠黃亦可以人工復修，不過官僚政策一旦迂腐陳舊，要修正就唔係咁易嘞。好似保育歷史建築物咁吖，早就被人批評不倫不類不合時宜，當局有無從善如流吖？有無自我檢討吖？所以咯喎，前古物諮詢委員會主席陳智思都幫理不幫親，向港府嘅保育政策開炮！

保育政策有乜唔妥呢？陳智思主要指出兩點。第一，家陣單從歷史評級嚟定奪一幢建築物應唔應該保留，根本不切實際：「依家全港有二百幢一級歷史建築物，七成屬私人所有，唔通政府全部買晒佢？」第二，前朝政府提出成立文物保育基金嚟保育歷史建築物，根本不可行：「邊有人肯畀錢啲富豪巨賈，買佢哋啲歷史建築？」

無錯嘞，家陣嘅保育政策真係同現實脫晒節o架，整色整水將二百幢建築物評為一級歷史建築之後，完全無配套措施跟進，一味見招拆招，見到拆樓先至臨急補鑊。你知啦，被評得一級歷史建築，就算唔係價值連城，都係開天索價，港府買得幾多幢呀？你話嘞，咁嘅保育政策係咪似足一件假古董得個樣吖？

最搞笑嘅係，就算裝模作樣，官老爺都裝得唔夠專業，貽笑大方。政府總部西座以超過五十年樓齡為由得到保留，反而八十年歷史建築何東花園就面臨清拆命運，保育結果天淵之別，唔爭議多多至奇啦。呢嗱，比何東花園歷史更加悠久、建築更有特色嘅甘道二十三號又面臨清拆厄運，話唔定又引起另一場保育爭議，港府隨時又被呢個炸彈炸得灰頭土臉。

所以話，陳智思要求港府檢討歷史建築物嘅保育標準，結果可能係嘥氣o架咋。官老爺最想保之育之嘅，唔係歷史建築物，而係得過且過胡混度日嘅官僚文化，景賢里被斧劈鏟鑿當局居然不知不覺，大浪西灣淪為富豪私人俱樂部當局居然後知後覺，就係例子。

一句講晒，保育進退失據，皆因政策戇居。要搞好保育，攞官老爺嘅迂腐腦袋翻新一番先啦，叮！