SUN搞作：少膽虫手記：「度縮」難改

新嘅一年又到，少膽虫不禁回首過去，二○一二年聽到最多嘅係「垃圾」同「廢渣」呢兩句，但少膽虫諗極都唔明大家點解要用呢啲字眼鬧《爛果》？《爛果》起得喺堆填區隔籬，出「垃圾」自然係好合理，「壹全霉」又點會係浪得虛名呢？倚在窗邊，少膽虫斯人獨憔悴。

就喺少膽虫沉思之際，一把熟悉而又乞人憎嘅聲音，又喺少膽虫耳邊響起，「少膽虫、少膽虫，快啲同我入房！」呢一句，少膽虫真係聽到麻木晒，淫賤黎每次叫人入房都無好嘢發生，推油、用皮鞭驅寒氣、摸「乖頭」……老老實實，呢啲嘢除咗少膽虫之外，仲有邊個頂得順？「入咗嚟未呀？」淫賤黎又一聲呻吟，少膽虫惟有大叫回應︰「入緊喇！」人生最痛，莫過於此……

入到房，淫賤黎露出一臉淫相，邊講︰「新嘅一年又到，少膽虫，你舊年做嘢都辛苦喇，等我請你北上鬆一鬆！」唔通少膽虫今次終於可以擺脫「入房不幸」嘅宿命，可以爽番晚？「老細，但係怕唔怕要你破費呀？」少膽虫循例做個樣問吓。點不知，一向縮骨嘅淫黎竟然好風騷咁講︰「呢啲嘢好閒，好似請人食餐飯咁閒！」

「請食飯咁閒？」竟然可以將北上比作請食飯，少膽虫真係霎時感動呀，立下決定要對淫賤黎改觀。「不過……」豪氣嘅淫賤黎突然猶豫，「老細，不過咩呢？」少膽虫即刻追問。淫賤黎繼續講︰「不過你知《爛果》舊年唔係咁掂，少膽虫你係公司老腫，好應該同公司共度時艱，你筆雙糧就用嚟墊支呢次北上費用喇！」

呢一刻，少膽虫終於明白咩叫江山而改，「度縮」難移……