政壇：政商定格：EQ遊埃及怨檔販死纏

建仔立法會議員EQ葛珮帆聖誕假陪老公去埃及旅行，原來佢七年前已去過當地，今次舊地重遊最大嘅感受係埃及好似比七年前更破爛，塞車依然，搞到佢懷疑自己去咗印度喎！佢之前已講過對埃及印象麻麻，事關當地檔販成日纏住遊客兜售，點知今次去到連佢老公都被檔販拉住唔放，為旅程添加驚險情節。

EQ特登去咗埃及著名嘅阿布辛貝神廟（Abu Simbel）參觀，原來佢一直都好想去神廟參觀，可惜上次唔夠時間，今次可遊神廟，心情非常興奮。

佢又話原本舊年區議會選舉後應承陪老公去旅行，老公仲訂好晒機票同酒店，點知最後都因公事而無法成行，搞到老公要一個人去，所以今次無論去邊都好，最緊要都係佢老公開心啫。