政壇：搞搞政：卿姐揸旗釀鴿仔退黨潮

白鴿黨近日疑似爆發退黨潮，懷疑與該黨喺立法會選舉失利同剛結束嘅領導層改選有關，矛頭直指同樣來自前綫嘅新任主席劉慧卿同副主席蔡耀昌，睇嚟該黨並冇因更換領導層而重新振作，反而危機處處、舉步維艱。

消息透露，唔少新東黨員，包括部分黃成智嘅支持者，對領導層當時執意派蔡耀昌參選，間接累死成智深感不滿；其後講過會「裸退」嘅卿姐反口參選黨主席，並成功擊敗同屬主流派嘅單仲偕；再加上喺區議會同立會選舉都落敗嘅蔡耀昌，竟可擊敗喺兩場選舉都大勝嘅胡志偉當選副主席，終於令佢哋嘅不滿爆發，醞釀集體退黨。

經過連日明查暗訪，都證實唔到真係有大批黨員退黨。曾任該黨九龍西支部社區主任嘅黃子希，早前喺社交網站自爆已完成退黨手續，原因係「睇唔到個黨有啲咩發展空間」，而曾喺北區參選嘅社區事務主任嚴志恆亦正考慮退黨，原因係不滿當年有份入中聯辦傾政改嘅卿姐當選主席，不利黨內改革，但否認與卿姐同蔡耀昌嘅前綫背景有關。