政壇：阿Paul話白鴿投訴嘥公帑

被指係「西環契仔」嘅立法會議員阿Paul謝偉俊，日前接受電視台訪問時親口證實中聯辦喺選舉中幫過佢，白鴿黨尋日就擒擒青去廉政公署投訴，話中聯辦干預香港選舉，涉嫌違反《選舉（舞弊及非法行為）條例》。阿Paul就澄清話，雖然參選得到中聯辦支持，但不涉及開支，希望白鴿黨告人之前要有真憑實據，唔好嘥納稅人金錢。不過，香港中通社就阿Paul嘅言論向中聯辦有關部門負責人查詢，負責人話阿Paul嘅說法係毫無根據嘅。

白鴿黨成員尋日拉晒橫額去到廉署總部，投訴中聯辦介入香港內部事務、干預選舉，又話阿Paul都承認受過中聯辦幫助，應該會產生一定選舉開支，但呢筆開支阿Paul並冇申報，中聯辦即係涉違反選舉條例咁話。阿Paul今次衰多口搞到中聯辦被人告，真係累街坊，點知佢就話︰「成日都話要坦白，坦白都有代價嘅！」佢又話如果有啲人要捉字蝨、無中生有，相信好多人都好唔得閒。其實佢唔亂講嘢，咪唔使畀對手抽後腳囉。