政壇：澳門官司開審在即 大劉突叫中央查貪腐

捲入澳門前任運輸工務司司長歐文龍貪污案嘅華人置業主席劉鑾雄（大劉）尋日一反平日低調常態，喺灣仔一間富豪飯堂午膳後高調同記者傾談十分鐘咁耐，話中央政府嘅反腐敗反貪工作應該包括港澳特區。不過，大劉本身都被澳門檢察院控以行賄及清洗黑錢罪，依家佢忽然指指點點，叫中央查埋港澳特區嘅貪腐。中國有個俗語叫「賊喊捉賊」，唔知啱唔啱用呢？大劉澳門單官司將於本月七日審理，結局如何，讀者真係要密切留意喇。

「希望領導人睇緊啲」

大劉話，見到喺十八大新當選嘅總書記習近平大倡反腐敗、反貪污，佢覺得好正確，仲提醒反腐敗反貪污亦要包埋港澳特區，唔希望港澳出現類似前上海市委書記陳良宇或前重慶市委書記薄熙來嘅貪腐事件。佢話，有感中央政府對一國兩制太過尊重，擔心有人利用程序控制港澳兩地，希望中央最高領導人及港澳小組領導日後可以睇緊啲，唔可以畀港澳特區政府有人利用程序，將中央玩弄於股掌之中。

大劉跟住大讚中共十八大選出的新領導班子個個有朝氣，又強硬，又講掌管港澳事務嘅新任中央政治局常委張德江係強硬派，做嘢唔會畏首畏尾，亦唔會上有政策，下有對策。之後話倘特區有貪腐，應該由中央去查吖，抑或特區政府去查呢？又指中央喜歡講支持特區依法施政，但究竟依法係依咩法律？係咪依自己嘅法？抑或依特區政府嘅法，佢話咁就唔知喇。

夜晚到酒店除夕倒數

身為澳門貪污案被告嘅大劉，喺澳門官司開審前發表上述言論，真係「可圈可點」，但佢重申唔係暗示緊歐文龍案喎。發表完偉論，夜晚到酒店參加除夕倒數，受審在即，仲有心情參加派對？