SUN搞作：打橫嚟講：香港人，輸半條街！

昨日黃昏，平安夜降臨前，走落旺角西洋菜街逛一圈，嘩！人頭湧湧，寸步難移，整條街塞滿大陸人，全是鄉音對話，彷彿返咗大陸，似多過人在香江。

成龍話中國人要管的！他說漏了，應是中國人的性慾（包括佢在內），係要管的！

這街上，近年，多咗好多怪人異士街頭表演者，一睇，就知全是內地的精英，有身體殘障及健全的兩類。

先講健全的賣藝人，有在地上鋪十呎乘二、三十呎大膠布，用粉末從手指罅滲下，寫出一千個不同字款的「福」字或「壽」字，這內地婦蹲在膠布上「寫字」，是沒有睇「貓紙」的，全是默書咁一筆一畫的畫出來！另一個光頭赤裸上身穿黃色功夫褲的「少林武僧」，愛請現場圍觀的鬼佬出嚟幫手，握着一粗長鐵枝，緊緊纏頸數圈，佢仍不斷氣，仲可以坐低盤腿，攞個捐助箱出嚟等收錢！附近，亦有多個音樂家拉奏二胡、彈琵琶，日日開檔，收入不錯。

肢體殘缺的，有用腳趾夾毛筆，坐在地上寫大字；亦有無手掌的，用前臂夾小粉筆寫美術字，更有個像被火燒得面目模糊、沒有手的，用口咬筆寫字，十分可憐；還有斷腳削面的少女與跛手盲眼的拍檔坐着輪椅，用小喇叭唱大陸歌的組合，總在各地鐵站口「行乞」，也得到不少同情和捐款！

當然，每個街角都有一個跪着不停叩頭的婆仔在乞錢，他們都是靠自己能力和才華討錢，值得同情，但這「社會問題」，點解香港政府無人做嘢？

今日聖誕節，祝各位一家大細共度天倫，齊齊整整普天同慶。

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府