政壇：政商定格：落選人大張俊勇遊澳洲

中華總商會會董Thomas張俊勇首次參選港區全國人大代表，最後只能取六百多票落選，轉個頭佢就同太太及囡囡飛往澳洲度聖誕，唔通係失望得滯要旅行散心？非也，佢笑言會以平常心面對賽果，絕不氣餒，又形容今次係好好嘅練兵機會，下屆一定捲土重來喎！

Thomas家人以前曾移居澳洲，熟晒地頭，今次行程包括暢遊悉尼、墨爾本同黃金海岸，大擦當地嘅新鮮海鮮。最開心仲係兩個女，由朝到晚拉住爸爸傾心事，彌補早前因忙於參選人大而少咗傾偈嘅時光。Thomas話八歲嘅大女同五歲細女，不知不覺已大咗好多，口脗似足大人咁老積。