政壇：搞搞政：蔣麗芸落區唔敢珠光寶氣

尋日係平安夜，建仔副主席兼立法會議員Ann蔣麗芸出席記者會介紹佢哋嘅一項民意調查時，專登着咗件紅衫扮聖誕老人應吓節，但以往珠光寶氣嘅佢，尋日就淨係戴咗對珍珠耳環，直言咁嘅打扮啲九西街坊最受落。咁梗係啦，九西以低收入人士較多吖嘛！

阿Ann自言過往都唔係好珠光寶氣之嘛，只不過有時為咗保值，咪買啲「大粒啲」嘅首飾傍吓身囉，但自從當選議員，成日要落區，所以都冇乜機會戴，惟有將大部分首飾都放晒入保險箱。佢又聲言自己唔少首飾都只係「細細粒」嘅「朱義盛」，買嚟純粹係為咗襯衫，依家佢覺得心靈嘅平安同喜悅重要啲喎。

佢老公梁海明上周失落港區人大選舉，不過佢直言唔使安慰老公，因為大家一早有心理準備，始終老公備選得比較遲，參選只為表達服務國家嘅心志，最後攞到六百幾票，做到候補代表已達到目的。做咗二十年全國政協委員嘅佢，亦已決定唔再爭取連任，專心做好立法會同地區工作。