政壇：陳勇教老友記沖涼禦寒

平安夜最低氣溫唔夠十度，新界區仲會凍啲，但新當選港區全國人大代表嘅新界社團聯會理事長陳勇尋日無懼寒風，一早就去咗大嶼山昂坪參加天壇大佛開光周年紀念典禮，而且只係比平時着多咗一件棉襖。佢仲主動教長者四招禦寒，但當中有啲招數比較冷門，未必個個長者都適合o架！

陳勇透露，自己本來都相當怕凍，以前冬天要着好多衫，但後來有位中醫教佢「多浴少衣」，即係寧願沖多幾次涼，都唔好着咁多衫，否則成日焗住啲皮膚，反而減低身體自行調節溫度嘅功能，因此佢平日除非晏咗起身唔夠時間，否則盡量都會早晚各沖一次涼。

佢又教長者每朝起身後，用手指輕按頭皮扮梳頭，話呢個動作可以增進腦部血液循環，令到個人成日都暖笠笠，又建議長者把握冬天有陽光嘅機會，多啲出去散步，以及喺正餐之外仲食多啲餅乾、麵包等零食，增加熱能吸收。