政壇：貪曾大熱當選「最奸男主角」

仲有幾日就係二○一三年元旦，又係時候搞番個二○一二年政壇奧斯卡頒獎禮。特首選舉呢場重中之重嘅政壇大戲，由去年尾上演到今年初，劇情峰迴路轉，令唔少人捧腹大笑或悲憤落淚，勇奪最佳影片絕對實至名歸，而「爛片王」就首選耗資巨額公帑兼且一連三集、拍極唔厭嘅立法會拉布戰。

今年政壇中人醜態百出，要選最佳男女主角真係好難，但要選「最奸男主角」，就非「貪盡海陸空」嘅「貪曾」前特首曾蔭權爵士。今年二月起，東方報業集團一一撕破貪曾嘅貪婪真面目，包括佢多次乘坐富豪遊艇同私人飛機、擬用特平租金租用「深圳禮賓府」、喺官式外訪中多次入住超豪總統套房，連落台後繼續亂花公帑豪裝前特首辦公室同涉嫌偷飲公家靚酒，真係貪到無人有。據聞廉政公署仍然喺度調查緊有關案件，明年隨時上演續集，劇目可能係《反貪污、捉貪曾》、《公審香港第一貪官》等！