政壇：項明生親拆瑪雅謎

為期四日嘅亞洲遊戲展尋日正式閉幕，我哋都有去湊熱鬧，但見人流稀少，同樓下美食同家電等主題嘉年華嘅墟冚情況相比，簡直好似兩個世界咁。作為主要參展商嘅Sony Computer Entertainment香港公司董事及總經理James項明生大呻損失慘重，佢話今次遊戲展開幕日啱啱撞正冬至兼「世界末日」，搞到市民出外消費意欲盡減。

以訛傳訛不可信

James好激氣咁話今年展覽係十一年嚟最差嘅一次，以肉眼估計，入場人數起碼少三成，除受到世界末日嘅傳言影響，仲因為主辦單位安排不周，冇傳媒導賞團、冇預備新聞稿、冇其他大型參展商撐場；往年內地客係展覽最大收入來源，但今年竟然冇安排內地遊客團參觀，場內冷清到可以喺度踢波。佢話唔排除明年會放棄參展，寧願將視線轉移去動漫節、電腦節等人流較多嘅活動。

瑪雅族人嘅長曆法預言本月二十一日為「世界末日」之說，引起部分市民恐慌，有人驚到買定大批食物匿喺屋企，有人及時行樂、千金散盡，有人參加極速配對搵另一半，最後大家都安然度過。寫過墨西哥旅遊書，到過當地同瑪雅遺裔接觸嘅James話，瑪雅人根本就冇擔心過世界末日，反而會好開心咁大事慶祝，仲喺社交網站同James互相祝賀。事關對瑪雅人當日係一個曆法嘅終結、另一個曆法嘅開始，有破舊立新嘅意思，只係外人以訛傳訛，誤解咗意思啫。

James聽瑪雅人話，上紀元充斥住瘟疫、戰爭、經濟動盪，呢個新紀元將會比上一個好，更加和平，經濟亦會轉好。為咗遊戲展，佢話呢幾日都住喺會展附近嘅酒店，冇返過屋企，錯失咗同家人做冬嘅機會。佢話今日會同家人擦番個聖誕大餐補數。