政壇：搞搞政：劉燕卿慨嘆毒油未解決

近期刮起「地溝油」襲港嘅恐慌，追查一輪，發現市面有食油樣本含有嘅致癌物的確超標，已經退休個幾月嘅消費者委員會前總幹事劉燕卿（Connie）好關注件事，尋日專登主動打電話上電台節目，幫消委會解釋該會關注食油三十幾年喇，慨嘆估唔到時至今日仍出現問題食油。

Connie喺個節目中大談消委會《選擇》月刊嘅往事，話創刊號時已就食用油進行測試，分析當時嘅花生油是否百分百純正，同埋有冇含有黃曲霉素等污染物。佢冇引述當年嘅檢測結果，但就強調，消委會一直有跟進食油安全問題，好似最近佢退休前出版嘅一期月刊中，就檢查咗橄欖油嘅成分。

今次食油問題引嚟內地地溝油湧入本港食肆嘅恐懼，Connie就話，市民只能靠食物標籤了解食物嘅成分，對製作過程毫不知情，不過，食物內含致癌物係可避免嘅問題，佢亦相信政府有能力做好監管，否則會惹嚟世界各國嘩然，影響香港整體信譽喎。