政壇：范國威頂唔順長毛

社民連梁國雄（長毛）同人民力量三子黃毓民、陳偉業同陳志全，出名聲大夾惡，早前編排議員座位時，多名建制派議員紛紛拒絕坐喺佢哋隔籬。依家立法會開工約三個月，連同為泛民陣營兼同屬激進泛民主派嘅新民主同盟范國威（Gary），都嗌就嚟頂唔順。

Gary喺議事廳坐喺長毛同人力三子中間，佢透露人力三子發言同示威時大聲唔在講，即使喺其他議員發言時，佢哋亦經常私下密斟，令佢難以集中精神。至於長毛就有事冇事都無啦啦大叫，加上開會一般都冇備課，又經常行出行入，每次返到位就會問「個會開到邊呀？」，當正Gary係義務秘書咁。