政壇：梁太影拖鞋蘭畀CY睇
特首梁振英（CY）上北京述職，夫人唐青儀尋日一個人出席北區花鳥蟲魚展覽開幕禮，一身啡色唐裝配西裝外套現身展覽嘅梁太，喺頒獎台上做咗近一個鐘「拍手機器」仍面不改容，遊覽會場時見到展覽冠軍作品，更愛不釋手要用手機影低，話要返去畀CY羨慕吓喎！
尋日天寒地凍，梁太由剪綵到頒發紀念品同獎項，食風食咗近一個鐘，之後又花咗好多時間睇展覽，見到參展盆栽仲好有興趣添。CY鍾意種嘢，梁太尋日就攞起手機影低展場中嘅「特首夫人盃」冠軍作品、嚟自菲律賓嘅「拖鞋蘭」，話等CY羨慕吓喎！其實，係老公訪京唔得閒嚟，佢幫手影定相畀老公睇咋啩﹖
梁唐青儀用手機影低冠軍作品「拖鞋蘭」，話要等老公CY羨慕吓喎。