政壇：「吳得掂」搞乜衰乜

成功嘅關鍵或者人人唔同，但失敗嘅原因卻大多類同。喺新一屆政府中擔任教育局局長嘅吳克儉，新手做到依家近半年，口碑似乎麻麻，大嘅如國教風波唔好提嘞，連尋日三宗冇關聯嘅小事，竟不約而同暴露吳克儉嘅「唔多掂」，先係原李惠利工業學院嘅用地紛爭，佢回應時大多照稿讀；主管教育嘅佢跟住入馬場，應酬之外都買馬投注，結果又輸晒；更搞笑嘅係，佢透露去澳洲旅行時曾經煲燶鮑魚，被大廚笑佢嘥咗靚嘢。唉，吳局長做乜瓣瓣「唔多掂」o架﹖唔怪得畀人改花名做「吳得掂」啦！

從政畀人圍 買馬鋪草皮

吳克儉尋日朝早出席完北區花鳥蟲魚展覽活動後就急急離開，原來趕住中午入馬場為一場盃賽做嘉賓。佢對買馬都有興趣，頭兩場賽事亦有落注，雖然每場都只係落十蚊注，但事後都證明佢嘅眼光同運氣都麻麻，鋪草皮就有佢份。

佢下晝又去咗參加一個民間組織嘅籌款活動，然後趕住去機場，開始佢放假赴澳洲嘅聖誕之旅。講到放假去旅行，吳克儉滔滔不絕，仲自動爆料，點知又係自爆咗烏龍嘢。

去過澳洲好多次嘅吳克儉話，今次會同太太先去悉尼，雖然仲未安排詳細行程，但佢就已經決定咗一定要去食海鮮。佢話最鍾意食鮑魚，仲覺得上湯煮先至最鮮味。為咗食靚鮑魚，吳克儉坦言佢試過喺當地一間可以即買即煮海鮮嘅餐廳自己炮製鮑魚，點知煮過龍，結果隻鮑魚煮到乾晒兼燶埋。

吳克儉煮嘢食畀人鬧、買馬又變成鋪草皮、為官從政又搞到政府總部畀人圍、仲要上級湊，或者佢真係要反省點解樣樣一鑊泡。