SUN搞作：打橫嚟講：何解「難堪」同「莊嚴」呀？

有關舊年八月，國務院副總理李克強訪港而觸發警方被投訴的調查，監警會日前公布「最終報告」，有十二名前線警員要受紀律處分，並聲言「無證據顯示警方有系統濫權」云云，即係高層無唔啱也！

唉！真戥啲前線警員唔抵，大家不妨睇睇由高層逐級逐層傳落嚟的所謂「行動指令」寫啲乜吖：「警務人員被提示在有需要時採取行動，以防止副總理難堪或受威脅」，仲有；「確保副總理出席的活動暢順及莊嚴地進行」。

喂！大佬！「受威脅」三字，還可以理解嘅，起碼，都有點「實在感」吖！那「難堪」一詞，就「虛無」得叫人難堪矣！點知副總理啲EQ有幾高呢？畀佢見到個大陸人當街踎喺度屙尿，我哋香港普通小市民都可能覺得好肉酸，好難堪，但佢可能覺得好小事，好平常，見慣晒，毫不難堪嗰喎！又或者，時任香港特首曾雀屎着住嗰件「凸點飛釘」嘅貼身衫去接佢機，貪曾覺得好Q靚，好很型仔，但副總理頂唔順咁醜怪嘅嘢呢？點界定「難堪」呀？

好啦！另一條，「活動要『暢順』」，小學二年班同學仔都明解嘅！但要「『莊嚴』地進行」，咁就考人喎！前中國揸Fit人老江出席國際首領大會，當眾梳頭，全中國人民都讚賞佢為咗優化儀容，表達尊重大會，但香港一大群九流政治評論員卻彈三彈四，話佢不「莊重」，咁，「莊嚴」的界線又點劃好呢！

香港警方高層指令模糊，害到下層伙記，手足無措之餘，仲食死貓受靶，劃花個「快勞」，升職無望，但高層卻大步檻過，真不公平！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

就係敢爆：

讀者可透過智能手機下載「東方互動」app，於「爆料」項上載影片，每個星期三《太陽報》及ontv同步大爆特爆！

email：sunweibo@opg.com.hk

「就係敢爆」網址tv.on.cc/hot