政壇：政商定格：鄭汝樺退休仲忙過做官

前財經事務及庫務局局長葉樹堃早前娶新抱，久未露面嘅運輸及房屋局前局長Eva鄭汝樺都有畀面出席，原來佢哋分屬波友，跟同一個教練學打乒乓波。當日Eva一身花衫咁神采飛揚到場，斷估退休生活一定樂得悠閒，不過佢就話依家忙過做官，每日嘅時間表排到密密麻麻，每日唔愁無節目，仲要既有動態，又有靜態，「修身養性」應有盡有，非常精彩。

Eva話依家每星期都會預留兩日返教會見吓教友一齊查經，另外一日走去學吓書法習字，再加兩日就去做吓運動，學打乒乓波，順便見吓班波友。就係咁打吓波、睇吓聖經、練吓字，一個星期好快又過喇！