政壇：政商定格：郭炳聯感激慈母叫起身

新鴻基地產日前舉行咗個獎學金頒授儀式，共有十名員工子女獲得大學本科獎學金。不過全場最矚目，要算係主席兼董事總經理郭炳聯嘅一番自嘲式訓勉，佢話雖然自己分別攞到劍橋同哈佛頒授嘅碩士學位，但中、小學時讀書其實唔係咁努力，要阿媽督促同鼓勵先有今日嘅成就。

郭炳聯回憶細個讀書時，一年要應付六次考試，但唔係次次都溫好書先去考，試過「臨急抱佛腳」，考嗰日嘅大清早先至溫習，但就要靠阿媽晨咁早叫佢起身溫書，郭老太果然一如傳聞對子女盡心盡力，每日好似鬧鐘咁準時叫醒佢。佢仲話自己重視教育係受父母嘅影響，到今時今日都十分感激媽媽經常鼓勵佢努力讀書，希望各位獲得獎學金嘅同學都要努力，日後報答父母。