政壇：搞搞政：泛民人大攪局 幫咗劉健儀

三十六加七個十二屆港區全國人大代表前日選出，原來除傳聞中嘅西環推薦名單外，泛民都有一份「必不可選」嘅十六人名單，呢份名單令代表中總嘅立法會議員廖長江以逾千四票當選「票王」，同埋令富貴黨榮譽主席Miriam劉健儀得以排包尾入局。

喺選舉前，政圈已流傳話唔好睇小嗰班約二百個泛民選委嘅力量，事關佢哋成事不足，但絕對敗事有餘。其實，泛民名單分成三部分，除南區區議員司馬文同教協方景樂係必然之選外，仲特別列出二十五個相對肯同佢哋溝通嘅專業同獨立人士，名單亦列出最後九個必贏或必輸名單，投畀必輸嘅人，目的就係將西環名單最後幾位危危乎嘅候選人逼出局。

有泛民中人透露，公共專業聯盟上周喺港大搞咗場人大選舉論壇，雖然得十幾個候選人出席，但正因為Miriam等有出席論壇，所以就將佢哋列入心水名單，而冇揀香港註冊中醫學會會長馮玖，原因純粹因佢冇去論壇。馮玖最後只可做第一候補，原來居中攪局嘅都有泛民中人。