SUN微博：打橫嚟講：成龍敢言，好嘢！

上星期一，大陸出版的《南方人物周刊》，以「大哥」為題，做了一個香港藝人成龍的專訪報道。

二○○九年，成龍在海南博鱉亞洲論壇，指斥香港和台灣因「太自由，而很亂」，並認為「中國人是要管的，否則便會為所欲為」，當時，台灣政府及人民都十分不滿佢之言行，嚇得成龍有幾年不敢踏足台灣半步，但，香港只擾攘兩三日便不了了之！當然啦！因為好多有切膚之痛的香港人非常認同「中國人」係要管的，若唔管佢哋，佢哋就會買晒香港的奶粉、湧晒落嚟生仔、拿黑錢買貴晒呢度啲樓、破壞晒香港文明的質素……

成龍好嘢！敢言！

愛國的成龍呢次又有嘢講，佢不滿香港變成「遊行之都」，乜都遊一餐，佢話有啲人無事做就遊行！遂建議「應該規定甚麼可以遊行，甚麼不能遊行」，此話一出，又被好事之徒大罵佢「可恥」，話佢咁鍾意管人，不如先管吓自己，尤其桃色新聞不少耶！

當一眾讀者關注成龍的政治知識與品格水平時，我看到該訪問中，成龍提及八十年代，他在香港為抗衡黑幫的滋擾，曾出錢「聘請」黑社會。

我想請問香港警方，佢咁做算唔算犯法？佢咁做是否證明香港警方無料到，能力不及「老黑」呢？

此外，成龍更話佢經常身懷兩支槍，亦有拿六個手榴彈對住黑人物。喂！軍火從何而來的？我等了一星期，警方卻未曾做嘢，是否如特首話齋處理咗就唔存在呢？請答一句吧！佢都幾為所欲為喎！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊（目及）實政府

email：sunweibo@opg.com.hk

「就係咁爆」網址：tv.on.cc/hot