政壇：政商定格：國泰艙務員快閃舞行善

雖然國泰空中服務員工會同資方拗緊加薪問題，氣氛緊張，但最近某個視頻網站上載咗五分鐘嘅短片，見到逾百位穿着整齊制服、拖住旅行篋嘅國泰「空姐」、「空少」喺國泰城出現，佢哋突然走進人群大跳熱舞，途人都睇到目瞪口呆，場面認真搞笑。

國泰企業傳訊總經理梁皚亭尋日就為呢段短片解畫，佢話呢次係一個愛心籌款活動，當日公司嘅一百一十五個空中服務員同機艙服務部同事，自發性咁喺公司總部組成「跳舞快閃黨」，義工隊跳完舞就向圍觀嘅同事收集捐款，募捐活動仲會持續一星期，幫助本地各類有需要嘅人士。