政壇：政商定格：葉澍堃娶新抱贏足14底

前經濟發展及勞工局局長葉澍堃嘅大仔瀚林月初迎娶愛妻，前晚擺酒筵開三十多席。新人Hiram & Connie一齊親手織咗冷頸巾送畀雙方父母，多謝佢哋多年來養育之恩。新郎哥話兩夫婦未去過南美，會到阿根廷、危地馬拉度蜜月三星期，去完之後就五大洲都去過晒嘞。咁會唔會盡快生小朋友，佢哋就話順其自然喎！

新老爺葉澍堃就話要讚一對新人令佢「事業」去到高峰，講嘅唔係重投職場，而係佢咁多年打麻雀紀錄係贏六底，娶新抱前夕同幾個老友竹戰，居然贏咗十四底，創咗佢麻雀事業嘅高峰，而幾位「受害」老友當然亦係座上客啦。