政壇：搞搞政：鬍鬚曾想去星洲做官？

近年發現好多人都鍾意拎香港同新加坡比較，財爺鬍鬚曾尋日喺網誌都話，佢發現咗兩地一個好有趣嘅分別。

鬍鬚曾感嘆近年有個講法，話陰謀論喺香港都頗有市場，而「末日論」之所以喺香港炒得咁熱烘烘，某程序亦反映社會上一種「恐懼心態」，反映港人自信心不足。佢又話新加坡傳媒每遇「好消息」都鍾意「一面倒鋪天蓋地」咁「報喜」，相反香港傳媒對「好消息」就比較冷淡；有壞消息出現，兩地傳媒報道嘅態度又會掉轉。於是佢又嘆氣咁話，其實港人過去百年成就都係港人所創，鼓勵港人勿妄自菲薄，仲霸氣一句：「香港人，怕甚麼？」

其實，「鬍鬚曾，你怕甚麼？」如果你唔計錯數、如果你唔做守財奴、如果你可以喺水浸嘅庫房滴出少少紓解民困、如果你無「壞消息」畀香港人，相信香港傳媒都唔使「一面倒鋪天蓋地」咁「報憂」。但如果佢計錯數都要傳媒「一面倒鋪天蓋地」咁報喜，或者佢要去新加坡做官喇！