政壇：卿姐掌白鴿黨出爾反爾

白鴿黨尋日改選領導層，聲言裸退又臨時着番衫參選嘅劉慧卿，以低票擊敗諗住坐定粒六當選嘅「單雞」單仲偕，成為該黨首名女主席。投票結果一公布，網民都O晒嘴，揶揄唔選又選嘅卿姐當選係「貫徹民主黨精神，出爾反爾」，更建議白鴿黨「改名叫前綫啦！」

成班等住上位嘅乳鴿可能都睇唔通發生咗乜嘢事，個黨就已揭到下一頁，唔怪得有網民話「留名睇人退黨」，相信今次選舉結果又會引發一場退黨潮。除咗領導層，三十個當選嘅中委入面，三分二係四十歲以上嘅老鴿，平均年紀成四十四歲，仲話望以清新形象吸引新黨員喎。今屆副主席由舊年先入黨嘅蔡耀昌，同埋負責創意文宣嘅羅建熙接棒，立法會議員胡志偉就以十幾票之差落選，但就以高票當選中委，成為中委票王。