政壇：許曉暉隔空撐囡囡賣旗
依家好多家長都會陪仔女賣旗，好似上周六朝早，民政局副局長Florence許曉暉帶住讀緊小學二年班嘅囡囡Seren喺中環賣旗，佢笑容滿面，好落力咁身教囡囡做善事。佢話囡囡係第一次賣旗，既興奮又緊張。問到囡囡知唔知點解要賣旗？佢即好醒目咁答，話係因為要為慈善機構籌款，幫助有需要嘅小朋友，Florence果然教導有方。
周六嘅天氣都幾熱，Florence見到個女賣旗賣到滿頭大汗，就攞手巾仔幫Seren抹汗。值得留意嘅係，個女賣旗嘅時候，Florence「忍手」唔幫忙，只係企到遠一遠望住表示支持，唔知呢個係咪佢平日教女嘅態度呢？
許曉暉（左）忍手冇幫忙，只係企喺遠處望住囡囡賣旗。