政壇：環境局正副帥鬥節能

自KS黃錦星上任做環境局局長後，為咗樹立環保形象，於是喺屋企搞節能行動，要屋企人盡量減少用電。唔知係咪睇到老闆親力親為推動環保唔敢鬆懈，定係想有意無意話畀人知其實自己都好環保，做下屬嘅有時都要騷吓嘅。

有「環保女神」之稱嘅副局長Christine陸恭蕙，尋日為地球之友一個步行籌款活動擔任主禮嘉賓，致詞時慨嘆全球現時正面對日益嚴峻嘅水資源危機，提醒參加者要無時無刻節約用水。為咗令佢講嘅道理更有說服力，佢仲自我揭秘，話近來喺屋企同家人鬥慳水，又話自己可以喺兩分鐘內沖完涼，慳番唔少寶貴嘅食水。

每日用電少黑英一半

天文台前台長「黑英」林超英前排喺電台節目中話KS係建築物節能專家，仲大讚KS為官前後都對環保咁上心，又引述KS威水史，話KS全家喺高峰期可以每人每日用一度電，比自己屋企每人每日用兩度電仲要少一半。黑英當時話自己輸得心服口服，之後仲爆出一句：「連我都打低埋，梗係有理由做局長！」

可能Christine覺得慳電唔夠保護地球，佢尋日就賣口乖話試過喺屋企舉行「鬥快沖涼比賽」，各家庭成員沖涼時會互相記低沖涼時間，除咗睇吓邊個係「慳水王」外，仲可以警惕全屋人要節約用水。Christine透露自己可以喺兩分鐘內沖完涼，又話當時已經覺得自己好犀利，但有個男性家庭成員竟然可以喺一分二十秒內沖完涼，大嘆對方可以神速沖涼，令佢覺得非常之不可思議喎！