SUN微博：打橫嚟講：放生鹹魚頭 荒謬過荒謬

雖說「民生無小事」，殊不知，原來「民『死』才更大件事」。

喺香港，生仔無床位的消息，已聽到耳膜麻木，再不是新聞；估唔到，連「死的」也難有一個「安樂窩」，除無地土葬之外，就是放置骨灰的龕場也不夠；私營的，更多是無牌違法經營，總之，混亂不斷，死都唔安樂。

早在五年多前，本報已揭發香港不少私營骨灰龕場的問題，加上墓園業權紛爭和管理不善，政府本應要好好處理吧！點知，那契弟曾蔭權只管自己坐豪華遊艇去澳門拜山，當然，仲藉機會大吃大喝，或許祭祀用的，佢都食埋呀！呢件粉皮眼尾都唔睇吓香港的「逝者」，搞到佢哋無處容身。可恨的，因上樑不正，下樑點會好？所以，地政總署和規劃署便卸得就卸，互相推搪，遂令那些「非法」的骨灰龕場無王管，四圍霸地「僭建」，不理「土地用途」，不管「城規要求」，也不顧「發牌制度」，凡有利可圖的，話之係「死人錢」，也照殺，搞到家陣，仲未搞得掂！

最好笑的，係今屆政府計劃喺十八區喪起骨灰龕場，但話要二○一九年至有地喎！咁！依家無位的，點算呀？無人知點答！不過，食衞局側側膊想特赦現今非法的龕場，卻遭「各界關注骨灰龕法案大聯盟」批評此乃「荒謬」，咁又係喎！如放生骨灰龕場的「僭建」，咁新界生人陽宅的「僭建」又特赦乎？

但如不放生龕場，難道派人去「清場」？陽宅就話「暴力」抬啲「釘子戶」走啫！骨灰龕場點掃呢？考起！卡夫卡也想死呀！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府

email：sunweibo@opg.com.hk

「就係敢爆」網址tv.on.cc/hot