SUN微博：網絡小說：《爛果》爛得出色

少膽虫縱橫報界十幾年，從未見過《爛果》嘅情況會咁差，近嚟正義傳媒嘅《好報》面世後，更加令到少膽虫憂心前景，惟有約埋啲行家出嚟食吓飯、訴吓苦。本來少膽虫以為大家都唔會鍾意《爛果》嘅宗旨「淫」同「假」，但世事往往都令人意料唔到……

《日月報》總編劈頭一句︰「果然係報界之星！」《日月報》素來同《爛果》無咩交情，今時今日報界競爭咁激烈，真係估都估唔到佢會咁講。少膽虫心中泛起咗一陣漣漪，所謂知音難覓，令少膽虫當堂眼濕濕咁話︰「真係諗都諗唔到，原來淫賤黎並唔係孤軍作戰o架！」《日月報》總編聽完少膽虫嘅由衷之言，都好似一臉感動，仲即刻捉實少膽虫隻手，口震震咁話︰「我幾時都好慶幸報界有《爛果》，如果無《爛果》，我哋仲可以捱到今時今日咩？分分鐘連我都要另謀高就呀！」雖然嗰一刻，感性嘅氛圍充斥喺我哋身邊，但少膽虫仍然尚有絲毫理智，「有冇咁誇張，無《爛果》，《日月報》會捱唔住？」

本來熱淚盈眶嘅《日月報》總編，突然一臉正經咁講︰「絕無誇張！少兄，仲記唔記得本報曾鬧出『A May Sing Grace』笑話？」「記得，當時成行都係咁講。」見佢咁認真，少膽虫惟有忍笑。《日月報》總編繼續講︰「當時，我老細嘈到拆天，我諗我都係死路一條o架喇！好彩有《爛果》救咗我！」少膽虫愈聽愈奇怪，心諗︰「又關我哋事？」「好彩《爛果》不時出啲又淫又假嘅新聞，令我哋單瘀嘢好快被遺忘，好似早排你哋單『脫北者』，我老細睇啲平民洗版，真係由心笑咗出嚟，我單嘢就忘記得一乾二淨，所以《爛果》爛得出色！」呢個「讚美」，少膽虫真係唔識回應，惟有以笑遮醜喇！