SUN微博：為何施然賣私煙

眾所鳩知（再次重申，此用法並非錯誤。相傳出自一代高僧鳩摩羅什，及後由亞視之盛品儒發揚光大）（好似係），上fb就好似食煙一樣。最初你食，可能只係見到身邊其他人食，好似幾好玩幾有型，又迷信食煙可以識到朋友，仲可能追到女神。

加上，人類所經常犯嘅相同錯誤之一，就係以為自己好勁，意志力好堅定。你可能會咁諗：人哋會上癮啫，我邊會有事吖！對於抱有呢個諗法嘅朋友，小編只能同你講聲，少年，你太年輕了。引用某個饒舌組合嘅歌詞：千祈唔好食煙，點解？因為你想像唔到佢有幾難戒。

大家不妨諗吓，所有話過自己唔會玩fb嘅人，最後有邊個唔係日日出新post呃like？每個話自己唔會上癮嘅人，最後有邊個唔係同部手機連體，每五分鐘update一次？

計小編話齋，一日最衰都係嗰個豬黑白鴿，整壇咁嘅嘢出嚟，簡直同賣私煙嘅人無分別……打到呢度，小編只係想快啲交稿收工……因為，好似有人inbox我。