政壇：搞搞政：建仔新丁爭位立立亂

雖然建仔係立法會第一大黨，但亦面對接班嘅問題。聽聞喺九龍嘅東同西，年輕區議員較多，要上位當然要先爭崩頭，所以已開始有人擔心下屆立會換屆時，建仔會立立亂。

喺九龍東，本來已考慮退位嘅立會議員「橄欖」陳鑑林，因排喺佢後面嗰幾個青年代表，包括黃大仙區議員黎榮浩同三名觀塘區議員柯創盛、洪錦鉉及陳百里鬥得太過難分難解，所以橄欖惟有頂硬上做多屆，但只係將問題推遲咗。如果陳百里真係加入政府做政治助理，可能表示佢退出呢場競爭，餘下嘅三人相信會鬥得更激烈。

九龍西本來都競爭激烈，後來殺出議會新丁阿Ann蔣麗芸，局勢先暫時緩和，但有傳話佢只會選一屆，不過阿Ann一直都未作正面回應，佢淨係話一切要由個黨安排。佢對落就係深水埗區議員鄭泳舜同油尖旺區議員葉傲東，佢哋鬥得難分難解，四年後會點真係好難預料。唔知阿Ann最後會唔會重蹈橄欖嘅歷史，做多屆暫且按下年輕黨員嘅爭鬥？