政壇：西九罪過貪曾懺悔補唔番

尋日本報披露「貪曾」曾蔭權留下「西九文化區爛攤子」，超支一百二十億元，醜聞曝光後，貪曾仍然若無其事。佢尋日早上出席喺會展嘅人大選舉會議，中午仲「施施然」去深水灣高爾夫球會，係打波抑或歎晏晝就唔知嘞，逗留粒半鐘先返淺水灣道屋企。

歸家後原來仲有「下場」。近三點鐘，佢細佬曾蔭培揸住架舊款寶馬，車埋兩男兩女去探阿哥，車上男女貌似五、六十歲，睇嚟一把年紀，成班人坐咗唔夠一粒鐘就走。走得咁急，唔通曾宅唔多好坐。

朋友走晒，唔悶就假。五點幾，貪曾叫司機車佢同太太去聖堂望彌撒，彌補心靈空虛。西九嚴重超支，對唔住全香港人，罪過，罪過。睇怕祈多一百次禱都補唔番喇！