政壇：維園阿哥搵真銀

兩年前風頭一時無兩嘅「維園阿哥」任亮憲，先喺維園彈起成為政壇新人類，跟住再喺社民連成名，過檔人民力量後依然有份喺區議會選舉狙擊工聯會「票后」陳婉嫻。驟眼睇佢係被力捧上位嘅政治新星，但自從捲入一單涉嫌強姦案後，政途似乎冇乜起色。尋日佢再度公開現身出席活動，但佢堅稱只係撐老友，自己已經完全退出政壇，現時專心幫人搞基金搵真銀喎！

由青年民建聯主席周浩鼎牽頭嘅「香港青年時事評論員協會」尋日舉行成立典禮，維園阿哥唔係成員，但佢話喺維園已經識周浩鼎，點都要捧吓場喎。佢仲話依家回歸金融行業，專責幫客仔成立基金同信託基金，最近都要周圍飛，所以短期內唔再玩政治。佢未喺維園發迹前，都係炒吓股票咁o架啦，依家算係做番金融老本行啫！對佢嚟講駕輕就熟。

預告一六年回歸

維園阿哥又話，自己再唔係人民力量成員，似乎好想同人力劃清界線。不過維園阿哥都講得無錯，事關人力同選民力量曾經發動過票債票償運動，狙擊畀佢哋鬧爆支持政改方案走入建制嘅白鴿黨，而尋日維園阿哥參加周浩鼎搞嘅開幕禮，即刻喺網上畀人力支持者鬧爆佢加入建制，所以佢同人力支持者應該勢成水火。

雖然退出政壇言猶在耳，但轉頭佢預告回歸政壇最快要二○一六年喎！睇嚟佢都係暫時退出！